سپر لیگ، حفیظ کی تماشائیوں سے احتیاطی تدابیر کی اپیل

کراچی ( سپورٹس ڈیسک)  کرکٹر محمد حفیظ نے پی ایس ایل کا میچ سٹیڈیم میں دیکھنے کے لیے آنے والے تماشائیوں سے ذمہ داری اور احتیاطی تدابیر اختیار کرنے کی درخواست کی ہے ۔پاکستان سپر لیگ کے چھٹے ایڈیشن میں لاہور قلندرز کی نمائندگی کرنے والے کرکٹر محمد حفیظ کا کہنا ہے کہ پی ایس ایل کے لیے خوش آئند بات یہ ہے کہ 20فیصد کراؤڈ کو اجازت ملی ہے لیکن اب ذمہ داری کراؤڈ کی ہے کہ وہ احتیاطی تدابیر اختیار کریں۔ محمد حفیظ نے کہا کہ کراؤڈ کو اجازت ملنا ایک اچھا فیصلہ ہے کیونکہ مزہ کراؤڈ کے ساتھ ہی آتا ہے ، اس سے گراؤنڈ میں انرجی میں اضافہ ہوتا ہے اور متحرک ہونے کا موقع ملتا ہے ۔قومی کرکٹر کا کہنا تھا کہ ہم سب کی کوشش ہو گی کہ فینز کو پی ایس ایل کے دوران تفریح پہنچائیں، پاکستان میں یہ پہلا ایونٹ ہے کہ کووڈ کے دوران تماشائی سٹیڈیمز کا رخ کررہے ہیں، تماشائیوں سے درخواست ہے کہ وہ احتیاطی تدابیر اختیار کر کے سٹیڈیمز آئیں ۔ حفیظ نے مزید کہا کہ کھلا ڑی اب بائیو سکیور ببل کے عادی ہو چکے ہیں، اب اس میں رہنا مشکل نہیں ہے کیونکہ کرکٹ جاری رہنے کیلئے یہ بائیو سکیور ببل بہت ضروری ہے ، اگر بائیو سکیور ببل نہ ہو تو کرکٹ ہی نہ ہو ۔