Daily Mashriq Quetta Urdu news, Latest Videos Urdu News Pakistan updates, Urdu, blogs, weather Balochistan News, technology news, business news

گندم کی امدادی قیمت ایک ہزار 650 روپے فی من مقرر

0

Get real time updates directly on you device, subscribe now.

اسلام آباد: حکومت نے گندم کی آئندہ فصل کے لیے کم از کم امدادی قیمت ایک ہزار 650 روپے فی من مقرر کردی اور فیصلہ کیا ہے کہ حالیہ سیزن کے دوران اطمینان بخش اسٹاک کو یقینی بنانے کے لیے مزید 4 لاکھ ٹن گندم درآمد کی جائے گی۔

یہ فیصلہ کابینہ کی اقتصادی رابطہ کمیٹی (ای سی سی) کے اجلاس میں کیا گیا جس کی سربراہی وزیراعظم کے مشیر خزانہ ڈاکٹر عبدالحفیظ شیخ نے کی۔

اجلاس میں پاکستان اسٹیل ملز کے ملازمین کے 11 ارب 68 کروڑ روپے کے واجب الادا بقایا جات کی سیٹلمنٹ کی بھی منظوری دے دی گئی۔

گندم کے حوالے سے کیے گئے دونوں فیصلوں کی روشنی میں رواں سال کی فصل کے لیے مقرر فی من قیمت 14 سو روپے میں 17.85 فیصد اضافہ کیا گیا جبکہ اضافی درآمد کرنے سے رواں برس گندم پر دی جانے والی سبسڈی 25 ارب روپے سے تجاوز کر جائے گی۔

اس طرح سرکاری شعبے میں درآمد کی گئی گندم کا کل حجم 22 لاکھ ٹن تک بڑھ جائے گا جبکہ 18 لاکھ ٹن پہلے ہی بک کی جاچکی ہے۔

سرکاری ذرائع کا کہنا تھا کہ سندھ جس نے گندم کی  حمایت کی تھی اس سمیت تمام صوبوں نے ایک ہزار 650 روپے فی من کرنے پر اتفاق کیا ہے۔

خیال رہے کہ چند ہفتوں قبل کابینہ کی اقتصادی رابطہ کمیٹی نے آئندہ فصل کے لیے گندم کی امدادی قیمت 16 سو روپے فی من کرنے کی تجویز دی تھی تاہم اپوزیشن میں دیہی علاقوں سے تعلق رکھنے والے اراکین نے اس کی مخالفت کی تھی۔

 

وزیراعظم عمران خان کی ہدایات پر ای سی سی نے گندم کی طلب و رسد کی مجموعی صورتحال پر تفصیلی غور و خوص کیا تھا اور مقامی منڈی کو مستحکم کرنے اور ملک بھر میں آٹے کی قیمت کم کرنے کے لیے ٹھوس فیصلے کیے تھے۔

اس حوالے سے جاری ایک سرکاری بیان کے مطابق ’ای سی سی نے گندم کی فصل کے لیے کم از کم امدادی قیمت 16 سو 50 روپے فی من مقرر کرنے کی منظوری دی ہے جبکہ موجودہ قیمت 14 سو 75 روپے فی من پر برقرار رہے گی‘۔

اجلاس کو بتایا گیا کہ ٹریڈنگ کارپوریشن پاکستان (ٹی سی پی) کے آخری ٹینڈر سے 15 لاکھ ٹن گندم کا انتظام ہوا۔

ملک میں درآمد کی جانے والی گندم کی مجموعی مقدار 32 لاکھ ٹن کے قریب ہوجائے گی جس میں 22 لاکھ ٹن گندم سرکاری جبکہ 15 لاکھ ٹن نجی شعبے میں درآمد کی گئی۔

 

اجلاس کو بتایا گیا کہ اکتوبر میں ٹی سی پی کے 4 بحری جہاز 2 لاکھ 17 ہزار ٹن گندم لے کر کراچی پہنچے تھے لیکن نومبر میں کسی جہاز کی آمد متوقع نہیں ہے۔

مزید برآں 6 لاکھ ٹن گندم لے کر 12 بحری جہاز دسمبر اور اس کے بعد 6 لاکھ 80 ہزار ٹن گندم 13 جہازوں سے جنوری میں پاکستان پہنچے گی۔

ای سی سی نے فیصلہ کیا کہ گندم سے متعلق تمام فیصلے وزیراعظم عمران خان کی ہدایات پر خصوصی کمیٹی کے بند کمرہ اجلاس میں کیے جائیں گے تا کہ کم سے کم اندر کی معلومات مارکیٹ پلیئرز تک پہنچے۔

علاوہ ازیں ای سی سی نے آٹا ملز کو یومیہ 38 ہزار ٹن گندم جاری کرنے کا بھی فیصلہ کیا جس میں 25 ہزار ٹن گندم پنجاب، 8 ہزار ٹن گندم سندھ، 4 ہزار ٹن خیبر پختونخوا اور ایک ہزار ٹن بلوچستان میں فراہم کی جائے گی۔

Leave A Reply

Your email address will not be published.