Daily Mashriq Quetta Urdu news, Latest Videos Urdu News Pakistan updates, Urdu, blogs, weather Balochistan News, technology news, business news

گینگ ریپ کا شکار لڑکی کے اہلخانہ سے ملاقات کیلئے جانے والے راہول گاندھی گرفتار

0

Get real time updates directly on you device, subscribe now.

بھارت میں پولیس نے دِلت برداری سے تعلق رکھنے والی گینگ ریپ کی متاثرہ لڑکی کے اہلخانہ سے ملاقات کے لیے جانے والے حزب اختلاف کی کانگریس پارٹی کے دو اہم رہنماؤں راہول گاندھی اور ان کی بہن پریانکا کو گرفتار کرلیا۔

یو پی کی پولیس نے انہیں اس وقت گرفتار کیا جب دونوں رہنما گینگ ریپ اور تشدد کے باعث ہلاک ہونے والی لڑکی کے خاندان سے ملاقات کے لیے شمالی گاؤں جارہے تھے۔

 

خیال رہے کہ گزشتہ ماہ دلت برادری سے تعلق رکھنے والی 19 سالہ لڑکی کا گینگ ریپ کیا گیا تھا جس کے بعد سے ملک بھر میں مظاہروں اور احتجاج کا سلسلہ جاری ہے۔

پولیس افسر منوج ڈکشٹ نے بتایا کہ دونوں پارٹی رہنماؤں کو علاقے میں 4 یا اس سے زائد لوگوں کی موجودگی سے متعلق پابندی کی خلاف ورزی کرنے پر حراست میں لیا گیا۔

پولیس نے کانگریس پارٹی کے قافلے کو متعلقہ گاؤں جانے سے روکا جس کے بعد پارٹی رہنما اپنی گاڑی سے باہر نکلے اور گاؤں کی طرف چلنے لگے لیکن پولیس نے انہیں دوبارہ روک دیا۔

اس موقع پر کانگریس پارٹی کے درجنوں کارکنوں اور پولیس کے مابین ہاتھا پائی ہوئی جبکہ پولیس اہلکار نے پارٹی کے کارکنوں کو منتشر کرنے کے لیے لاٹھی چارج بھی کیا۔

مقامی میڈیا پر نشر ہونے والی فوٹیج میں دیکھا گیا کہ پارٹی کے کچھ کارکن زخمی ہوگئے اور راہول گاندھی پھسل کر زمین پر بھی گرے لیکن پولیس انہیں اپنے ہمراہ لے گئی۔

 

ممکن ہے کہ دونوں رہنماؤں کو پولیس کے ہمراہ دہلی واپس بھیج دیا جائے اور انہیں رہا کردیا جائے گا۔

واضح رہے کہ دلت برادری سے تعلق رکھنے والی 19 سالہ لڑکی کو 14 ستمبر کو ضلع ہاتراس میں 4 افراد نے مبینہ طور پر گینگ ریپ کا نشانہ بنایا تھا۔

متاثرہ لڑکی کے اہل خانہ نے مقامی میڈیا کو بتایا تھا کہ گھر کے باہر کھیت میں لڑکی کی لاش برہنہ حالت میں پائی گئی جو خون میں لت پت تھی اور وہ ریڑھ کی ہڈی ٹوٹنے کی وجہ سے مفلوج تھی۔

تاہم منگل کو دہلی کے ایک ہسپتال میں متاثرہ لڑکی نے دم توڑ دیا تھا۔

پولیس نے بتایا کہ اونچی ذات سے تعلق رکھنے والے 4 افراد کو گرفتار کرلیا گیا۔

بھارت کی 20 کروڑ دلت آبادی کو طویل عرصے سے امتیازی سلوک اور بدسلوکی کا سامنا رہا ہے اور مہم چلانے والوں کا کہنا ہے کہ کورونا وائرس وبائی امراض کے دوران برادری کے افراد پر حملوں میں اضافہ ہوا ہے۔

Leave A Reply

Your email address will not be published.