’کم عمری میں جسامت پر میڈیا کی منفی رپورٹنگ سے پریشان رہی‘

0

ہارر ڈراما سیریز ’اسٹرینجر تھنگز‘ سے کیریئر کا آغاز کرنے اور اسی سے شہرت حاصل کرنے والی نوجوان اداکارہ 16 سالہ ملی بوبی براؤن نے اعتراف کیا ہے کہ میڈیا نے ان کی جسامت کے حوالے سے منفی رپورٹنگ کی۔

اپنی سولہویں سالگرہ منائے جانے کے ایک دن بعد ہی ملی بوبی براؤن نے طویل انسٹاگرام پوسٹ میں خود سے متعلق میڈیا کی منفی رپورٹنگ اور اس کے ذہن پر پڑنے والے اثرات پر کھل کر بات کی۔

ملی بوبی براؤن نے انسٹاگرام پوسٹ میں ایک ویڈیو بھی شیئر کی جس میں انہوں نے اپنے متعلق شائع ہونے والی خبروں کی چند شہ سرخیاں اور اپنی پرانی ویڈیوز شامل کیں۔

ملی بوبی براؤن نے انتہائی کم عمری میں شوبز کیریئر کا آغاز کیا تھا، انہوں نے محض 12 سال کی عمر میں ’اسٹرینجر تھنگز‘ نامی امریکی ہارر ڈرامے سے بطور چائلڈ آرٹسٹ کیریئر کا آغاز کیا۔

ملی بوبی براؤن کو شاندار اداکاری کی وجہ سے محض 13 سال کی عمر میں ’ایمی ایوارڈز‘ کے لیے نامزد بھی کیا گیا۔

اسی طرح وہ ٹائمز میگزین کی 100 بااثر اور مشہور شخصیات کی فہرست میں بھی شامل ہوئیں۔

صرف ایک ہی ڈرامے میں کام کرنے کی وجہ سے ملی بوبی براؤن کو کافی شہرت حاصل ہوئی اور اب تک وہ اسی ڈرامے کے ہر سیزن میں دکھائی دیتی ہیں۔

اب اس ڈرامے کا چوتھا سیزن ریلیز کیا جائے گا اور اس میں بھی ان کا اہم کردار ہے۔

ڈرامے میں شاندار اداکاری کی وجہ سے امریکی و یورپی میڈیا میں ملی بوبی براؤن کی خبریں بھی شائع ہوتی رہیں تاہم اس دوران انہیں پرکشش لڑکی کے طور پر بھی دکھایا گیا۔

Leave A Reply

Your email address will not be published.